چالاکییەکان

🔸ئەمڕۆ، شاری ئەحسا؛ شاری داهێنەری پیشە دەستییەکان لە یونسکۆ، شانشینی سعودیە، د. هەڤاڵ ئەبوبەکر پارێزگاری سلێمانی، لە سەر بانگهێشتنامەی فەرمیی بەڕێزان ئەمیندارێتیی پارێزگای ئەحسای شانشینی سعودیەو بەچاودێریی و ئامادەبوونی بەڕێزان میر سعود بن تەڵال بن بەدر ئال سعود خاوەنشکۆی شاهانەو پارێزگاری ئەحساو، ئەندازیار عيسام بن عەبدوللەتیف ئەلمولا ئەمینداریی شاری ئەحساو سەرۆکی شارە داهێنەرەکانی یونسکۆ بۆ پیشە دەستییەکان و هونەرە میللییەکان و پارێزگارانی شارە داهێنەرەکانی یونسکۆ لە جیهاندا، بەسەرۆکایەتیی شاندی کوردستان و پارێزگای سلێمانی (شاری داهێنەری ئەدەب لە یونسکۆو شاری 🔸پێنجوێن کاندید بۆ وەرگرتنی نازناوی شاری فێربوون لە یونسکۆ)، بە ئەندامێتیی بەڕێزان 🪪دکتۆر عەبدولفەتاح هەورامیی نوێنەری بۆردی پێنجوێن؛ شاری فێربوون و ئەندازیار شەماڵ ئەبوبەکر بەرپرسی ژوری سلێمانی شاری داهێنەری ئەدەب لە یونسکۆ، بەشدارییان کرد لە مەراسیمی کردنەوەی دیداری نێودەوڵەتیی یونسکۆ بۆ بۆ پیشە دەستییەکان و هونەرە میللییەکان. پارێزگاری سلێمانی و وەفدی هاوڕێی؛ زۆر بە گەرمیی و تایبەتیی لەلایەن بەڕێزان میر سعود بن تەڵال بن بەدر ئال سعود خاوەنشکۆی شاهانەو پارێزگاری ئەحساو، ئەندازیار عيسام بن عەبدوللەتیف ئەلمولا ئەمینداریی شاری ئەحساو سەرۆکی شارە داهێنەرەکانی یونسکۆ بۆ پیشە دەستییەکان و هونەرە میللییەکان و پارێزگارانی شارە داهێنەرەکانی یونسکۆ لە جیهاندا، پێشوازیکران، پارێزگاری سلێمانی خەڵاتی تایبەتیی پارێزگای سلێمانی؛ شاری داهێنەری ئەدەب لە یونسکۆو، پێنجوێن؛ شاری فێربوونی پێشکەشکردن و هەموو بەشداربووان خۆشحاڵیی خۆیان لە بەشداریکردنی وەفدی پارێزگای سلێمانی؛ دەربڕی.

پڕۆگرامی پێنجوێن؛ شاری فێربوون، لە چوارچێوەی بەشی گەنجانی خۆیدا، لەڕێگەی گەنجانی ماتۆڕسواری شارۆچکەکە بەشداری پاڵەوانیەتیەکی ماتۆرسکیل دەکات، کە تیایدا بەسەرپەرشتی قائمقامییەتی قازای پینجوێن و ڕێگەپێدانی دەزگا ئەمنیەکان و بە ئامادەبوونی ژماریەکی بەرچاوی ماتۆڕسواری ناوچە جیاجیاکانی سنووری پارێزگای سلێمانی نمایشێکی ماتۆڕسواری بەڕێوەچوو. ئامانج لەم چالاکییانە - پتەوکردنی پەیوەندی برایەتی - یەکخستن و گەشەپێدانی تواناکانی گەنجان - بەرزکردنەوەی ئاستی هاریکاری و تێگەیشتن لە ئایندەیەکی نزیکدا، پڕۆگرامەکە پلانی بەڕێوەبردنی پاڵەوانیەتیەکی دیکە دادەڕێژێت، بە هیوای پاراستنی سەلامەتی و پێشخستنی وەرزش و هاریکاری کۆمەڵایەتی.

لە ڕێکەوتی ٢١ی کانوونی دووەمی ٢٠٢٥، سیمینارێکی تایبەت بە ناونیشانی "چۆن زووبگەینە ئامانجەکانمان" لە پڕۆگرامی پێنجوێن شاری فێربوون بەڕێوەچوو. سیمینارەکە کە لەلایەن بەڕێز م. توانا عبدالکریم پێنجوێنی پێشکەشکرا، بەڕێزیان تیشکی خستە سەر گرنگترین ڕێگاکانی دیاریکردن و گەیشتن بە ئامانجە کەسی و پیشەییەکان. بەشداربووان، چەندین تەکنیک و ستراتیژی نوێیان فێربوون بۆ دانانی پلانی کاریگەر و جێبەجێکردنی بە شێوەیەکی سەرکەوتوو. هەروەها باس لە گرنگی بەردەوامبوون و خۆڕاگری لە ڕێگەی گەیشتن بە ئامانجەکان کرا. م.توانا جەختی لەوە کردەوە کە "گەیشتن بە ئامانجەکان پێویستی بە پلانی ورد و کاتبەندی دروست هەیە. دەبێت خەڵک فێری ئەوەبن چۆن ئامانجە گەورەکان بکەن بە چەند هەنگاوێکی بچووکتر." لە کۆتایی سیمینارەکە سوپاس و ڕێز بەخشرا(بەڕێز .توانا عبدالکریم پێنجوێنی)

دیدارێک بەمەبەستی هەنگاونانی پێنجوێن بەرەو یونسکۆ و بەشداری سەرکەوتووانە لە کۆنگرەی شارە فێربوونەکانی جیهان. ئەمڕۆ ڕێکەوتی ٢٥-١٢-٢٠٢٤ لەدیدارێکدا کە بە ئامادەبوونی بەڕێز پارێزگاری سلێمانی و قائمقامی قەزای پێنجوێن و ژمارەیەک لە بەڕێوەبەر و نوێنەری فەرمانگە حکومی و حیزبی و چین و توێژە جیاجیاکانی قەزاکە دیدارێکی گرنگ و ئامانجادار ئەنجامدرا، لە چوارچێوەی هەوڵەکانی شاری پێنجوێن بۆ بەدەستهێنانی ئەندامێتی تۆڕی شارە فێربوونەکانی یونسکۆ ، شاندێکی باڵای پڕۆگرامی پێنجوێن شاری فێربوون بەشداری لە کۆنگرەی شەشەمی شارە فێربوونەکانی جیهان کرد کە لە شاری جوبەیلی سعودیە بەڕێوەچوو. شاندی پێنجوێن لەم کۆنگرەیەدا خستیانە ڕوو کە شارەکەیان خاوەن پێگە و پێشینەیەکی گەورەیە لە بواری پەروەردە و فێرکردن و ئامادەیی تەواویان هەیە بۆ بەشداریکردن لە پڕۆسەی گۆڕینەوەی ئەزموون و شارەزایی لەگەڵ شارە فێربوونەکانی جیهان. جێی باسە، ئەندامبوونی پێنجوێن لە تۆڕی شارە فێربوونەکانی یونسکۆ دەبێتە هۆی کردنەوەی دەروازەیەکی نوێ بۆ پەرەپێدانی پڕۆسەی پەروەردە و فێرکردن لە شارەکەدا و دەرفەتی زیاتر دەڕەخسێنێت بۆ سوودوەرگرتن لە ئەزموونی وڵاتانی پێشکەوتوو لەم بوارەدا. بەم شێوەیە، پێنجوێن هەنگاوێکی گرنگی ناوە بەرەو ئاستی نێودەوڵەتی و چاوەڕوان دەکرێت لە داهاتوویەکی نزیکدا ببێتە یەکێک لە شارە فێربوونەکانی سەر بە ڕێکخراوی یونسکۆ.

سیمینارێکی گرنگ لە لایەن (پ.ی.د.عبدالفتاح هەورامی) پێشکەش کرا بۆ ئەو فێرخوازانەی بەشداری خولی مایکرۆسۆفت ۆورد و درومانی خانمانیان کرد بوو ، لەسیمینارەکەدا تیشکخرایە سەر شێوازی هەوڵدان بۆ داهێنان و بوون بە کەسایەتییەک جێدەستمان لە ژیاندا دیار و کاریگەربێت بۆ خۆمان و چواردەورمان.

ئەمڕۆ ڕێکەوتی ١٧-١٢-٢٠٢٤ دەستەی باڵای ئەندامانی بۆردی بەڕێوەبردنی پڕۆگرامی پێنجوێن شاری فێربوون، سەردانی بەڕێز دکتۆر هەڤاڵ ئەبوبکر پارێزگاری سلێمانیان لە دیوانی پارێزگای سلێمانی کرد بەمەبەستی ئاڕاستەکردنی سوپاس و پێزانینی بەڕێز پارێزگاری سلێمانی، لەکاتێکدا لەماوەی ڕابردوودا سەرۆکایەتی شاندی پڕۆگرامی پێنجوێن شاری فێربوون بوو لە شەشەمین کۆنگرەی شارەفێربوونەکانی جیهان کە لە شاری جوبەیلی شانشینی سعودییە ئەنجامدرا، لەم دیدارەدا گفتوگۆ لەسەر دوابەشداریی بۆردی پێنجوێن؛ شاری فێربوون بە سەرۆکایەتیی پارێزگاری سلێمانی بۆ شەشەمین کۆنگرەی نێودەوڵەتیی یونسکۆ بۆ شارەکانی فێربوون کرا. بەڕێزان سەرۆک و ئەندامانی بۆردی بەڕێوەبردنی پێنجوێن؛ شاری فێربوون، سوپاسی هەوڵ و بەشدارییەکانی پارێزگاری سلێمانیان کرد، پارێزگاری سلێمانی سوپاس و پشتیوانیی تەواوی خۆی بۆ سەرخستنی ئەم هەوڵە شایستانە دووپاتکردەوە.

لە ڕێکەوتی ١٦-١٢-٢٠٢٤ کۆڕی (هۆشیاری و بەرپرسیارێتی)لەژێر چاودێری قائمقامیەتی قەزای سەیدسادق، ڕێکخراوی ئازادی لاوانی کوردستان - سەنتەری قەزای سەیدسادق بە هاوبەشی پڕۆگرامی پێنجوێن شاری فێربوون لە لایەن بەڕێز پ.ی.دکتۆر محمدخانییەوە پێشکەشکرا.

پ.ی.دکتۆر محمدخانی کۆڕێکی تایبەت بە "فێربوونی بەردەوام" پێشکەش کرد لە کۆڕێکدا کە ڕێکەوتی ١٥-١٢-٢٠٢٤ لە هۆڵی بۆنەکانی شارۆچکەی پێنجوێن بەڕێوەچوو، پسپۆڕی پەروەردە د. محمدخانی جەختی لەسەر گرنگی فێربوونی بەردەوام وەک کلیلێکی گرنگ بۆ پێشکەوتنی کەسی و پیشەیی کردەوە.

لە درێژەی زنجیرە چالاکییەکانی پڕۆگرامی پێنجوێن شاری فێربوون ڕێکەوتی ١٥-١٢-٢٠٢٤ بەڕێز پ.ی.دکتۆر محمدخانی بەسێ پایەیی گرنگ بەهاکان و خێزان و کۆمەڵگە ناحیەی گەرمکی سەربە قەزای پێنجوێنی پرشنگدارتر و بەهرەوەرکرد.

ئەمڕۆ ڕێکەوتی ٥-١٢-٢٠٢٤، شاری جوبەیل، شانشینی سعودیە، چالاکییەکانی دواهەمین ڕۆژی شەشەمین کۆنگرەی نێودەوڵەتیی یونسکۆ بۆ شارەکانی فێربوون ICLC6، بەبەشداریی کاراو بەرهەمدارو دیاری شاندی بۆردی سەرپەرشتیی پێنجوێن؛ شاری فێربوون.

ڕێکەوتی ٤-١٢-٢٠٢٤ ئەندامانی بۆردی باڵای (پڕۆگرامی پێنجوێن شاری فێربوون) بە سەرۆکایەتی بەڕێز (د.هەڤاڵ ئەبوبکر) پارێزگاری سلێمانی و شاندی یاوەری لەگەڵ بەڕێز (ئیزابێل کێمبێف) بەڕێوەبەری پەیمانگای شارەکانی فێربوون لە یونسکۆ کۆبونەوە، لەم کۆبونەوەیەدا گفتوگۆ کرا سەبارەت بەو میکانیزمانەی چۆن پێنجوێن ببێتە ئەندام لە شارەفێربوونەکانی جیهان لە یونسکۆ، ئەوەی مایەی خۆشحاڵییە بەڕێز (ئیزابێل کێمبێف) بەڕێوەبەری پەیمانگای شارەکانی فێربوون لە یونسکۆ خۆشحاڵی خۆی بۆ ئەو هەنگاوە دەربڕی و بەڵێنی هاوکاری و دروستکردنی هەماهەنگی لەگەڵ (پڕۆگرامی پێنجوێن شاری فێربوون) دەربڕی. بەوهیوایەیی ئەم کۆبونەوە و لێکتێگەیشنانە هەرچی زووە و لەماوەیەکی نزیکدا ببێتەهۆی ئەوەی پێنجوێن وەک یەکەم شاری کوردستان و عێراق ببێتە شارەفێربوونەکانی جیهان لە یونسکۆ.

لەیەکەم ڕۆژی کۆنگرەی شەشەمی شارەفێربوونەکانی جیهان، ئەمڕۆ ڕێکەوتی ٣-١٢-٢٠٢٤ لە شاری جوبەیل، شانشینی سعودیە، بە ئامادەبوونی بەڕێزان ئەندازیار خالید بن محەمەد ئەلسالم سەرۆکی دەستەی شاهانەی جوبەیل و یەنبوع و، ئەندازیار مەحمود بن ساڵح ئەلزیب سەرۆکی جێبەجێکاری دەستەی شاهانەی جوبەیل و، سەرۆک و بۆردو پارێزگارو مایەرو بەرپرسی سێ سەد شاری فێربوونی ئەندام لە پەیمانگای یونسکۆ بۆ فێربوون بە درێژایی ژیان، د، هەڤاڵ ئەبوبەکر پارێزگاری سلێمانی سەرۆکی شاندی بۆردی سەرپەرشتیی پێنجوێن؛ شاری فێربوون، بە سەرۆکایەتیی بەڕێز زانا ڕەحمان و ئەندامێتیی بەڕێزان حاجی حەبیبی کانی شابان و د. عەبدولفەتاح هەورامیی و د. ڕەوف کەریم، بەشداریکرد لە شەشەمین کۆنگرەی نێودەوڵەتیی یونسکۆ بۆ شارەکانی فێربوون ICLC6 لە شاری جوبیلی شانشینی سعودیە، هەوڵەکانیان بۆ بە ئەنجامگەیاندنی ئەو هەوڵە شایستانەی لە شاری پێنجوێن لەلایەن بۆردی سەرپەرشتیی پێنجوێن؛ شاری فێربوون و دەستەبژێرێکی خۆبەخشی خەڵکە جوامێرو هۆشیارو دڵسۆزەکەیەوە دەستیپێکراوە، بەچڕی لەگەڵ سەرۆکایەتیی و بڕیاردەرانی یونسکۆو شارە ئەندامە بەشدارەکاندا؛ دەستپێکرد، بەو ئامانجەی پێنجوێن وەک شاری فێربوون، لە ئاستی نێودەوڵەتیدا، لە یونسکۆ؛ تۆمار بکرێت.

ئێوارەی ڕۆژی ٢-١٢-٢٠٢٤ گەیشتنی شاندێک بەسەرپەرشتی پارێزگاری سلێمانی وبەشداری دەستیەک لە ئەندامانی پڕۆگرامی پێنجوێن شاری فێربوون،بۆ شارەکانی دەمام و جوبەیل، شانشینی سعودیە، بەمەبەستی بەشداریکردن لە شەشەمین کۆنگرەی نێودەوڵەتیی یونسکۆ بۆ شارەکانی فێربوون ICLC6 لە شاری جوبەیلی شانشینی سعودیە، بەو ئومێدەی ئەو هەوڵە شایستەیەی لە شاری پێنجوێن لەلایەن بۆردی سەرپەرشتیی پێنجوێن؛ شاری فێربوون و دەستەبژێرێکی خۆبەخشی زاناو زرنگ و خەڵکە جوامێرو هۆشیارو دڵسۆزەکەیەوە دەستیپێکراوە، بگاتە ئەنجام و ئامانج و، پێنجوێن وەک شاری فێربوون، لە ئاستی نێودەوڵەتیدا؛ تۆمار بکرێت.

وەفدێکی باڵای پڕۆگرامی پێنجوێن شاری فێربوون بە سەرۆکایەتیی پارێزگاری سلێمانی د.هەڤاڵ ئەبوبکر ، لە ژێر چاودێریی بەڕێز خادمی دوو حەرەمە پیرۆزەکە شا سەلمان بن عەبدولعەزیز ئال سعود پاشای سعودیەدا، بانگهێشتی شەشەمین کۆنگرەی نێودەوڵەتیی یونسکۆ بۆ شارەکانی فێربوون ICLC6 لە شاری جوبەیلی شانشینی سعودیە دەکرێت، بەو ئومێدەی ئەو هەوڵە شایستەیەی لە شاری پێنجوێن لەلایەن دەستەبژێرێکی خۆبەخشی زاناو زەنگین و زرنگ و خەڵکە جوامێرو هۆشیارو دڵسۆزەکەیەوە دەستیپێکراوە، بگاتە ئەنجام و ئامانج و، پێنجوێن وەک شاری فێربوون، لە ئاستی نێودەوڵەتیدا؛ تۆمار بکرێت. جێی باسە لەئێستادا ئەو وەفدە بەڕێزە لە ئێستادا لەشاری جوبەیلی شانشینی سعودیەن بەمەبەستی بەشداریکردن لەو کۆنفڕانسە جیهانییەدا.

بەمەبەستی ئەنجامدانی كاری هاوبەشی مرۆیی‌ و پەروەردەیی‌ و ژینگەیی‌ و تەندروستی، پڕۆگرامی پێنجوێن شاری فێربوون یاداشتێكی لێكتێگەیشتنی لەگەڵ زانكۆی سلێمانی واژۆكرد. ڕۆژی ٢٨ی تشرینی دووەمی ٢٠٢٤، یاداشتنامەكە لەنێوان (حەبیب مەحمود ساڵح) دامەزرێنەر و ئەندامی بۆردی باڵای پڕۆگرامی پێنجوێن شاری فێربوون و (پ.ی.د.زانا مەحمود) یاریدەدەری سەرۆكی زانكۆی سلێمانی بۆ كاروباری زانستی‌ و خوێندنی باڵا‌ واژۆكرا. لەمیانەی ڕێوڕەسمەكەدا، (پ.ی.د زانا مەحمود) ئاماژەی بەگرنگی پڕۆژەكە كرد و وتی: “هیوادارین ئەم یاداشتنامەیە تەنیا لەسەر وەرەقە نەمێنێتەوە و كاری هاوبەش‌ و ئیشی باشی بەدوادا بێت”. هەر لەوبارەیەوە، (حاجی حەبیب مەحمود ساڵح) ئەندامی بۆردی باڵای پڕۆگرامی پێنجوێن شاری فێربوون لە لێدوانێكدا بۆ “سایتی زانكۆ” وتی: “ئەم هەماهەنگییە لەگەڵ زانكۆی سلێمانی بۆ ئێمە مایەی خۆشحاڵییە، چونكە هەر شوێنێك زانكۆ بۆ كاری پەروەردەیی لای لێبكاتەوە، گرنگی زۆرتری هەیە”. وتیشی: “ئەم پڕۆژەیە كارێكی مرۆییە و دەمانەوێت خزمەتی مرۆڤ بكەین، دڵنیاشین زانكۆی سلێمانی هەر شتێك، كە خزمەتی هاووڵاتیان‌ و ئەم نیشتمانە بكات، گرنگی پێدەدات، بۆیە بەخۆشحاڵییەوە حەزمان كرد ئەم یاداشتی لێكتێگەیشتنە واژۆ بكەین”. جێی باسە، پڕۆگرامی پێنجوێن شاری فێربوون لە ساڵی ٢٠١٨ بە چاندنی نەمام دەستیپێكرد، دواتر پڕۆگرامی پەروەردەیی‌ و تەندروستی بۆ زیادكرا و ڕێكاری كارگێڕی بۆ گیرایەبەر و دەست بەجێبەجێكردنی كرا. لە چوارچێوەی ئەو پڕۆژەیەدا تائێستا ٤١ هەزار نەمام لە شارۆچكەی پێنجوێن چێنراوە، شەش هەزار و حەوت سەد كەسیش، سودمەندبوون لە خولی پەروەردەیی‌ و تەندروستی‌ و ژینگەیی‌ و منداڵان‌ و چەند بوارێكی دیكە.